कामशेत:
कामशेत (ता. मावळ) येथील इंद्रायणी नदीवर कपडे धुण्यासाठी गेलेल्या आई व ६ वर्षीय मुलाचा रेल्वेच्या धडकेत दुर्दैवी मृत्यू झाला. काल (दि. २७) रोजी सकाळी साडे अकराच्या सुमारास ही घटना घडली. या घटनेने संपूर्ण कामशेत शहरात शोककळा पसरली असून सर्वत्र हळहळ व्यक्त केली जात आहे.
गोदावरी गणेश देवाडे (वय २८, रा. कामशेत, ता. मावळ, जि. पुणे) व मुलगा ओम गणेश देवाडे (वय ६, रा. कामशेत, ता. मावळ, जि. पुणे) अशी रेल्वेच्या धडकेत मृत्यू झालेल्यांची नावे आहे.
लोणावळा लोहमार्ग पोलिसांनी दिलेल्या माहितीनुसार, कामशेत येथील इंद्रायणी नदी तीरावर मयत गोदावरी या आपल्या मयत ६ वर्षीय मुलासह आणखी एक मुलाला घेऊन कपडे धुण्यासाठी गेल्या होत्या. तेथून परतताना लोहमार्ग क्रॉस करत असताना त्यांनी एका मुलाला प्लॅटफॉर्मवर ठेवले व दुसऱ्या मुलाला वर ठेवत असताना मागून आलेल्या कोम्बतूर कुर्ला रेल्वे गाडीची त्यांना धडक बसली. या धडकेत त्यांचा जागीच मृत्यू झाला.

error: Content is protected !!